Hulp kom stadig ná Mianmar-skudding

2012-11-12 13:53

Sint Ku – Reddingswerkers in Mianmar het Maandag gesukkel om mense in afgeleë dorpies te bereik wat ook deur 'n sterk aardbewing in die land geraak is.

Die aardbewing het al 13 lewens geëis. ‘n Brug en ‘n myn het ineengestort.

‘n Reeks kragtige naskokke het ook die land getref ná Sondag se skudding, wat 6,8 gemeet het.

Amptenare sê dat hulle besig is om hulp aan die slagoffers te verskaf, maar dat dit moeilik is om met bevolkings in afgeleë gebiede te kommunikeer, en dus moeilik is om die skade te assesseer.

Meer as 100 huise is tydens die skudding beskadig.

Afgeleë dorpies in die noorde het aan die nuusagentskap AFP gesê dat daar nog geen reddinsgwerkers by hulle na die aardbewing was nie.

“Ek het nog nooit so ‘n groot aardbewing in my lewe gesien nie. Almal is angsbevange,” het Win Tint, hoof van die dorpie Khu Lel, gesê.

Inwoners van die dorpies is gedwing om tydelike skuilplekke op te slaan in nabygeleë velde.
 
– Volg Nuus24 op Twitter

- Sapa - AFP