Huldeblyke stroom in vir legendariese Jobs
2011-10-06 07:43
San Francisco – Pres. Barack Obama en tegnologie-legendes soos Bill Gates en Mark Zuckerberg het Woensdag hul stemme gevoeg by 'n menigte oor die wêreld heen wat die dood van Apple se medestigter, Steve Jobs, betreur het.
Obama het Jobs beskryf as een van Amerika se "grootste innoveerders" en het gesê dis gepas dat baie mense van sy dood uitvind op 'n toestel wat hy uitgevind het.
"Hy het ons lewens getransformeer, hele bedrywe herdefinieer, en iets reggekry wat bitter min in die mens se geskiedenis gedoen word: hy het die manier verander waarop elkeen van ons die wêreld sien," het Obama in 'n verklaring gesê.
Ook Microsoft se Bill Gates het Jobs se dood betreur.
"Die wêreld sien baie min iemand wat so 'n enorme impak maak soos wat Steve gemaak het, en die uitwerking daarvan sal vir generasies nog gesien word. Vir diegene wat gelukkig genoeg was om saam met hom te werk, was dit 'n baie groot eer. Ek sal Steve vreeslik mis," het Gates gesê.
Die Facebook-stigter Mark Zuckerberg het op sy beurt op Facebook geskryf: "Steve, dankie dat jy 'n mentor en vriend was. Dankie dat jy vir ons gewys het wat jy bou kan die wêreld verander. Ek sal jou mis."
Die media- en tegnologiekommentator Jeff Jarvis het op Twitter oor Jobs gesê: "Ons het ons Gutenberg, Edison, Picasso, Carnegie verloor.... "
Jobs is Woensdag dood ná 'n lang stryd teen kanker. Hy was 56.
– Volg Nuus24 op Twitter.
- AFP