Huishoudster sit 20 jaar ná sy kind mishandel

2013-02-19 10:51

Kuala Lumpur – ‘n Indonesiese huishoudster is Dinsdag in ‘n Maleisiese hof tot 20 jaar tronkstraf gevonnis nadat sy skuldig gepleit het op aanklagte van poging tot moord en fisieke aanranding.

Die vrou het haar werkgewer se vier maande oue seun onder andere op die grond gegooi.

Die huishoudster, wat slegs as Yuliana bekendstaan, is deur die Kuantan-hof tot 15 jaar tronkstraf gevonnis vir poging tot moord en nog vyf jaar vir fisieke mishandeling.

Regter Mohd Azhar Othman het gesê die swaar vonnis is bedoel as ‘n afskrikmiddel en ‘n les, nie net vir die huishoudster nie, maar ook aan die publiek.

Die nasionale televisiekanaal het Maandag beeldmateriaal uitgesaai wat wys hoe die 24-jarige huidhoudster die kind in die lug gooi en hom daarna herhaaldelik op die grond gooi.

Nina Suraya Sulaiman, die kind se ma, het aan 'n plaaslike koerant, The Star, gesê sy was besig om ontbyt te eet toe sy op haar selfoon gesien het hoe die aanval plaasvind. Die ma se selfoon is gekoppel aan 'n kringtelevisiekamera in die huis.

– Volg Nuus24 op Twitter

 

- Sapa-DPA