Honderde in China tronk toe vir kinderhandel
2012-07-06 14:14
Beijing – Altesaam 802 mense in China, wat vermoedelik by kinderhandel betrokke is, is in hegtenis geneem, het die Chinese ministerie vir openbare sekuriteit Vrydag gesê.
Volgens die ministerie is 181 kinders gered in ‘n ondersoek wat oor 15 provinsies strek.
Die onlangse ondersoek het gefokus op twee kinderhandel-groepe en tot die inhegtenisneming van die groepe se leiers gelei.
Kinderhandel is ‘n groot problem in China. Sy streng een-kind beleid het ‘n florerende mark in babas gelaat, veral vir seuns wat as die tradisionele erfgenaam gesien word. Dié beleid beperk die meeste stadsouers tot een kind en landelike gesinne tot twee, indien dié gesin se eersgeborene ‘n dogter is.
Meeste van die kinders word ontvoer, maar sommige kinders word deur families, wat nie die kind kan bekostig nie, of nie ‘n dogter wil hê nie, verkoop.
Die nasionale ondersoek is vroeër vanjaar begin ná die polisie tekens van kinderhandel, insluitend die gereelde verskyning van uitstedige swanger vroue by ‘n kliniek in Noord-China se Hebei-provinsie, geïdentfiseer het.
‘n Dokter by die kiliniek is in hegtenis geneem, het staatsmedia berig. Dit is nie bekend of die swanger vroue ook in hegtenis geneem is nie.
In sentraal China se Henan-provinsie is vier verdagtes op ‘n bus in hegtenis geneem ná hulle vier babas probeer verkoop het.
Die staatsmedia het ook berig dat ‘n babadogter vir tussen 30 000 en 50 000 yuan (sowat R39 000 en R65 000) verkoop kan word, terwyl die seuns vir tussen 70 000 en 80 000 yuan (sowat R91 000 en R105 000) verkoop word.
China het verlede jaar meer as 8 000 babas, wat verkoop is, gered. Kinderhandelaars is toe swaar strawwe, insluitend die doodstraf opgelê.
– Volg Nuus24 op Twitter
