Honde gyselaar gehou in sakedrama
2011-08-03 18:22
Sydney – 'n Makelaar se vier opreggeteëlde honde word vir Aus$300 000 gyselaar gehou nadat ‘n multimiljoen-dollar saketransaksie skeefgeloop het.
Die miniatuur-poedel, Maltese terriër en twee Maltese shih-tzus is uit Ian Lazar se huis in Sydney gesteel. Hy het hulle as sy “klein engeltjies” beskryf, berig die Sydney Morning Herald.
“Hulle het geweet die honde is my kinders. Hulle trek elke oggend klere aan, het nagklere en ek het tydens my egskeiding vir hulle baklei soos ‘n mens vir jou kinders baklei,” het Lazar gesê.
Die opgewekte makelaar, wat lenings gee aan mense wat deur die bank geweier is, het gesê hy vermoed die honde is deur twee mans gesteel wat beweer hy skuld hulle geld vir ‘n saketransaksie.
Lazar het gesê hy is sedert die honde se verdwyning deur “derde partye genader om hulle terug te koop of hulle sal een vir een keelaf gesny word”. ‘n Foto van die honde in ‘n hok is ook na hom gestuur as bewyse dat hulle nog lewe.
Lazar, wat so baie van honde hou dat hy beplan om ‘n vyf-ster hotel genaamd “Pucci’s” te open, het gesê hy sal eerder “self doodgaan voordat hy sien hoe sy pragtige honde pyn verduur”.
Hy het egter geweier om aan die ontvoerders se eise gehoor te gee en het gesê hy hoop die polisie of die aanbod van ‘n groot beloning sou sy honde terugkry.
– Volg Nuus24 op Twitter
- AFP