Hond stap elke dag na kerk ná eienaar se dood
2013-01-16 16:53
Rome – Sedert sy eienaar twee maande gelede oorlede is, het Tommy die hond nog nie een diens by die klein kerk in die suide van Italië, waar sy eienaar se begrafnis gehou was, gemis nie, het die Italiaanse media Woensdag berig.
Wanneer die klokke van die Santa Maria Assunta-kerk elke middag in San Donaci naby Brindisi begin lui, stap die 12-jarige Duitse Herdershond van die dorp tot reg voor by die kerk se preekstoel, berig die Il Messaggero.
Sy eienaar, wat in die plaaslike dialek bekendgestaan het as “Maria tu lu campu" – “Marie van die veld” – het alleen saam met Tommy en drie ander honde gewoon.
Dié troeteldiere het haar pligsgetrou gevolg terwyl sy haar daaglikse take uitgevoer het en is sedertdien deur die dorp aangeneem.
Nadat hy sy eienaar se kis by die kerktrappe opgevolg het op die dag van haar begrafnis, het Tommy daagliks teruggekeer.
Hy sit rustig deur die dienste, dope en begrafnisse, het die pastoor, Donato Panna, gesê.
– Volg Nuus24 op Twitter
- Sapa - AFP
