Hond erf meer as vrou se enigste seun
2010-06-24 07:42
Miami. – Hondelewe se voet! Vir Conchita, ’n geliefde chihuahua wat ’n $3 miljoen-erfporsie (sowat R22 miljoen) van haar eksentrieke baas gekry het, is die lewe eerder ’n lied.
Gail Posner se enigste seun gaan die erflating volgens berigte betwis. Posner het vir Conchita (wat baie kere ’n diamanthalssnoer aangehad het) ’n trustfonds agtergelaat, asook nog $27 miljoen (sowat R205 miljoen) vir die werknemers in haar Miami-herehuis sodat hulle tot hul afsterwe in gemak na haar troeteldiere kan omsien.
Aan Bret Carr, haar vervreemde enigste seun, het sy $1 miljoen (sowat R7 miljoen) nagelaat.
’n Hof moet nou besluit of sy ma gemanipuleer is om haar geld weg te gee – soos Carr aanvoer – en of dit inderdaad haar wens was. “Sy sou dit nooit gedoen het nie tensy sy onder sterk invloed verkeer het,” het hy luidens The Miami Herald gesê.
Haar werknemers het volgens Carr “haar paranoia en neiging om in haar eie wêreld te leef vererger”.
Volg Nuus24 op Twitter
- Sapa - AFP