Hof hoor genadedood versoek
2009-08-07 10:41
Perth – ‘n Verpleegsorg-groep in Australië het ‘n ongewone saak voor die hof gelê om te bepaal of hulle ‘n verlamde man wat soebat om toegelaat te word om te sterf, kan bystaan met genadedood.
Christian Rossiter (49) is as kwadrupleeg verklaar ná twee onverwante ongelukke. Hy het eers 30m ver van ‘n gebou af geval, en is toe deur ‘n motor raak gery.
Hy het die verpleegsorg-groep wat hom versorg, versoek om hom by te staan met ‘n genadedood.
"Ek is Christian Rossiter en ek wil doodgaan. Ek is ‘n gevangene van my eie liggaam. Ek kan nie beweeg nie, ek kan nie my trane afvee nie. Ek is nie bang vir die dood nie, net vir pyn”, het hy aan verslaggewers gesê.
Rossiter, wat eens ‘n aandeelmakelaar was, word deur middel van ‘n buis in sy maag gevoer. Hy vra dat dit stopgesit word sodat hy kan sterf.
Die verpleegsorg-groep, Brightwater Care, wat hom 24uur ‘n dag versorg het Vrydag die hof gevra om te bepaal of hulle aan sy wense mag voldoen.
"Die situasie plaas Brightwater in konflik tussen sy taak om mense te versorg en sy verpligting om Mnr. Rossiter se versoeke te respekteer. Dit lig ook komplekse kwessie rondom die wet”, het die groep se regsverteenwoordiger gesê.
Australië se wetgewing beskou genadedood as ‘n misdaad en in sommige state is dit strafbaar met lewenslange tronkstraf.
-Sapa