Hillary vaar 'baie beter' ná mediese toetse
2013-02-05 13:17
New York – Bill Clinton, oudpresident van die VSA, het gesê sy vrou, die voormalige minister van buitelandse sake, Hillary Clinton, het nog mediese toetse ondergaan, maar vaar “baie beter.”
Clinton het Maandag met verslaggewers gesels ná die begrafnis van Ed Koch, die voormalige burgemeester van New York.
Mev. Clinton het Sondag glo vyf uur lank mediese toetse ondergaan en is aangeraai “om rustig te wees vir ‘n maand.”
Oudpres. Clinton het gesê hy verwag dat sy ten volle sal herstel.
Philippe Reines, woordvoerder vir mev. Clinton, het Sondag gesê die toetse was deel van ‘n gewone opvolg-ondersoek.
Clinton (65) het in Desember maaggriep gekry toe sy van Europa na die VSA teruggekeer het. Sy het weens ontwatering flou geword en harsingskudding opgedoen.
Reines het destyds in ‘n verklaring gesê dokters het later ontdek dat ‘n bloedklont ná die harsingskudding gevorm het.
Die demokraat John Kerry is verlede week deur die Amerikaanse senaat gekies om die leisels by Clinton oor te neem.
– Volg Nuus24 op Twitter
- Sapa - AP
