Hillary troos Haïti
2010-01-18 09:51
Port-au-Prince - Hillary Clinton, Amerikaanse minister van buitelandse sake, het ontredderde inwoners van Haïti die naweek getroos dat Amerika seker sal maak dat die land “beter en sterker” is na die aardbewingtragedie.
“Ons (Amerika) sal vandag, môre en in die toekoms hier wees,” het Clinton, wat Saterdag in Haïti aangekom het, gesê.
Intussen het ’n Suid-Afrikaanse reddingspan gister om 03:00 Suid-Afrikaanse tyd in Haïti aangekom. Die span het reeds Donderdag daarheen vertrek, maar hul vlug is vertraag weens skade aan ’n lughawe in Haïti.
Die Suid-Afrikaners moes saam met 41 ander reddingspanne, waaronder drie van Amerika se weermag, wag. Die Suid-Afrikaanse span is 40 lede sterk en bestaan hoofsaaklik uit mediese personeel en ingenieurs. Hulle het 10 ton soek- en reddingsmateriaal saamgeneem, asook mediese voorrade.
Die Tshwane-metroraad en die organisasie Gift of the Givers stuur ook reddingspanne na Haïti. Intussen het beseerde aardbewingslagoffers Vrydagaand verslae toegekyk hoe dokters en verpleegsters ’n veldhospitaal verlaat. ’n Belgiese mediese span het dié gebied in Port-au-Prince ontruim nadat die Verenigde Nasies (VN) hulle glo aangesê het om dit te verlaat.
Dr. Geert Gijs, een van die personeellede wat by dié hospitaal gewerk het, het egter gesê as koördineerder van die span het hy opdrag gegee dat die span die hospitaal net Vrydagaand moes verlaat. Die besluit is glo geneem omdat dit nie meer veilig by die hospitaal was nie. Die onveilige toestande hou verband met gerugte van uitbarstings van geweld in die omgewing.
’n Kanadese span het die hospitaal ook Vrydagmiddag verlaat, maar die Belge was Saterdagoggend weer terug. Gijs het gesê die VN het beloof om Saterdagnag beveiliging te verskaf. Belgiese soldate sou na verwagting Sondagmiddag laat ook by die hospitaal opdaag om die mediese span te help beveilig.
– Reuters, Sapa en CNN