Hillary Clinton tuis ná bloedklont

2013-01-03 10:24

Washington – Hillary Rodham Clinton, minister van buitelandse sake in die VSA, is drie dae nadat dokters ‘n bloedklont in haar kop ontdek het, uit ‘n hospitaal in New York ontslaan.

Clinton se woordvoerder, Philippe Reines, sê die minister se mediese span sê sy maak goeie vordering. Die dokters is ook oortuig dat sy ten volle sal herstel.

Die voormalige presidentsvrou is met bloedverdunners behandel om ‘n klont in ‘n aar wat deur die spasie tussen die brein en die skedel agter die regteroor loop, op te los.

Reines sê die minister is nou gretig om terug te keer werk toe.

Clinton (65) het verlede maand maaggriep gekry toe sy van Europa na Amerika teruggekeer het. Dit het veroorsaak dat sy erg gedehidreer en flou geword het, wat tot harsingskudding gelei het.

Reines het destyds in ‘n verklaring gesê dokters het later ontdek dat ‘n bloedklont ná die harsingskudding gevorm het.

Volg Nuus24 op Twitter

- Sapa - AP