Hillary Clinton in hospitaal met bloedklont

2012-12-31 09:06

New York – Hillary Clinton, minister van buitelandse sake vir die VSA, is in ‘n hospitaal opgeneem om behandeling vir ‘n bloedklont te kry.

Dit volg nadat die minister vroeër vandeesmaand harsingskudding opgedoen het.

Clinton (65) se nuutste gesondheidsterugslag sal haar ‘n rukkie langer uit die publieke oog hou, terwyl sy voorberei om ná vier jaar as die VSA se top-diplomaat uit te tree.

Sy het vroeër die maand maaggriep gekry toe sy van Europa na Amerika teruggekeer het. Dit het veroorsaak dat die voormalige presidentsvrou erg gedehidreer en flou geword het, wat tot harsingskudding gelei het.

Clinton se assistent, Philippe Reines, het in ‘n verklaring gesê dokters het later ontdek dat ‘n bloedklont ná die harsingskudding gevorm het.

“Sy word met antistolmiddels behandel en is by New York Presbiteriaanse Hospitaal sodat hulle die medikasie oor die volgende 48 uur kan monitor,” het hy gesê.

Reines wou nie verder oor haar toestand uitbrei nie.

Volg Nuus24 op Twitter  

- Sapa - AFP