Hillary Clinton binnekort weer op haar pos

2012-12-28 10:15

Washington –  Hillary Rodham Clinton, die Amerikaanse minister van buitelandse sake, sal volgende week terugkeer werk toe nadat sy byna drie weke lank siek was.

Philippe Reines, Clinton se woordvoerder, het gesê sy sterk aan by die huis en sal volgende week haar kantoorskedule hervat. Hy het gesê Clinton het weens 'n vakansie nie 'n skedule vir dié week nie.

Die 65-jarige Clinton is al sedert vroeg Desember siek nadat sy tydens 'n vyfdaagse besoek aan Europa 'n maagvirus opgedoen het. Sy moes weens dié virus 'n beplande reis na Noord-Afrika en Abu Dhabi kanselleer.

Haar dokters het die afgelope naweek gesê sy is erg gedehidreer weens die virus. Sy het flou geword en harsingskudding opgedoen.

Clinton moes weens haar siekte 'n oorsese reis en getuienis oor die aanval op die Amerikaanse ambassade in Libië kanselleer.
      
– Volg Nuus24 op Twitter

- Sapa - AP