Herrie oor oorsaak van Air France-vliegramp
2011-05-20 08:05
Parys – Die uitvoerende hoof van Air France het Donderdag bespiegelings in die media verwerp oor die oorsaak van ’n vliegramp in 2009 en gesê dit is te vroeg om te sê wat die oorsaak was.
Pierre-Henri Gourgeon wou ook nie sê of die uitslag van ’n ondersoek op die vlugopnemers van die vliegtuig sy posisie as uitvoerende hoof van die Frans-Nederlandse moedermaatskappy, Air France-KLM, sal beïnvloed nie.
Al 228 insittendes op die Airbus 330 is dood toe die Air France-vliegtuig op 1 Junie 2009 in die Atlantiese Oseaan neergestort het terwyl dit van Rio de Janeiro na Parys onderweg was.
Die vlugopnemers is vroeër vandeesmaand opgespoor en word deur die Franse rampondersoekagentskap ondersoek.
Daar is teenstrydige mediaberigte oor die aanvanklike lesings van die data op die vlugopnemers.
Die koerant Le Figaro het vroeër vandeesweek vinger gewys na die bemanning van die vliegtuig, maar die radiostasie Europe1 het Donderdag berig die bemanning is vrygespreek.
Die beampte wat in beheer van die ondersoek is, het Woensdag aan AFP gesê voorlopige ondersoeke van die vlugopnemers het die moontlikheid van enige “groot foutwerking” van die vliegtuig uitgesluit, maar klein foute was moontlik.
“Dis onmoontlik om aannames te maak oor enige vorm van verantwoordelikheid,” het Gourgeon Donderdag op ’n nuuskonferensie in Parys gesê.
“Kom ons wag totdat die kenners ’n duidelike boodskap gee voordat ons in een of ander rigting gaan en bespiegel.”
Gourgeon is gister deur die raad van Air France vir nog ’n vierjaartermyn aangestel. - Reuters
- Die Burger