Herrie oor hijab woed voort in Europa
2009-08-17 06:45
Leopold Scholtz
Brussel – ’n Warm debat oor pres. Nicolas Sarkozy se planne om die Islamitiese hijab in Frankryk te verbied woed nou al weke lank.
Die hijab is die gewaad wat vroue volgens die fundamentalistiese Islam moet dra. Dit bedek die hele liggaam en kop met net die oë wat uitsteek.
Sarkozy het einde Junie gesê aangesien Moslem-vroue meestal gedwing word om dit te dra, tas dit hul menswaardigheid aan. Hy het hulle “gevangenes agter ’n net” genoem en gesê dit neem hul identiteit weg.
Die Assemblée Nationale, oftewel die parlement, het toe ook ’n gekose komitee aangewys om die president daaroor van raad te bedien.
Een van Sarkozy se ministers, Fadela Amara, ’n Moslem-vrou van Algerynse afkoms, het pas heftig agter haar president ingeval. In ’n onderhoud met die Britse Financial Times het sy gesê die hijab verteenwoordig die “verdrukking van vroue”.
Sommige lande of munisipaliteite in Europa verbied Moslem-vroue wat in hul diens is selfs om ’n eenvoudige kopdoek te dra. Die rede is die skeiding tussen staat en kerk en die gevolglike feit dat die dra van enige godsdienstige simbool die staat se religieuse neutraliteit aantas.
Onder die oppervlak gaan dit egter oor veel meer as slegs ’n gewaad of vroue se waardigheid. Dit gaan oor wat die karakter van Europa moet wees. Luidens ’n berig in die Franse dagblad Libération het die Franse polisie in ’n verslag gesê dat “minder as 400” Moslem-vroue die hijab dra.
Bevryde Moslem-vroue sê die dra van die hijab is nie altyd vrywillig nie en dat Moslem-mans geweldige druk op hulle uitoefen om dit te dra.
– Beeld