Helikopterongeluk: Polisie bevestig sterftes

2013-01-16 12:05

Londen – Die Britse polisie het Woensdagoggend bevestig dat twee mense dood is ná 'n helikopter in Sentraal-Londen 'n hyskraan getref en neergestort het.

Nog twee mense is beseer en is na 'n hospitaal geneem, het Sky News berig.

Die polisie het ook benadruk dat die ongeluk nie aan terrorisme gekoppel kan word nie.

“Daar is niks wat daarop dui dat die ongeluk aan terrorisme gekoppel is nie,” het ‘n woordvoerder van Londen se teenterreurmag gesê. Die helikopter het naby die Vauxhall-treinstasie en die hoofkwartier van die Britse intelligensiediens, MI6, neergestort.

'n Ooggetuie het vertel hoe hy die ongeluk sien gebeur het.

“Daar was ‘n flits en toe stort die helikopter grond toe. Dit het ontplof en daar het rook uitgetrek,” het Paul Ferguson aan BBC News gesê.

Erin Rogers, wat by ‘n busstop naby die Vauxhall-treinstasie gewag het, het gesê sy het ‘n harde knal gehoor en toe gesien hoe stukke van die hyskraan na die grond val.

“Toe is die helikopter in vlamme.”

Trein- en- busdienste is tydelik in die gebied opgeskort.
 
– Volg Nuus24 op Twitter

- Sapa - AP