Hele EU ingesleep by Grieke se skuldtragedie
2011-06-19 09:01
Den Haag – Europa staan dalk voor die grootste krisis in sy geskiedenis sedert 1945.
Indien Griekeland amptelik bankrot speel, of – nog erger – uit die eurosone moet padgee, kan hy groot dele van die Europese Unie (EU) met hom in die afgrond in saamsleep.
Vir alle praktiese doeleindes is Griekeland reeds bankrot. Jare lank het agtereenvolgende Griekse regerings stemme gekoop deur geld soos confetti rond te strooi. Dié praktyk haal hom nou in, want die staatskuld nader reeds 160% van die land se binnelandse nasionale produk.
Die EU en Internasionale Monetêre Fonds (IMF) het reeds €110miljard aan Griekeland geleen. Dié geld is egter soos in ’n swart gat ingesluk, en ekonome meen ’n verdere €85 miljard word benodig. Boonop sal die Griekse staat besittings ter waarde van €30miljard moet verkoop en sy uitgawes met minstens 10% moet besnoei.
Die salarispakket vir die staatsdiens, met al sy tienduisende amptenare wat al dekades lank basies niks doen nie, moet met ’n derde verminder word.
Twee probleme, albei haas onoplosbaar, blokkeer dit alles egter.
Die eerste is dat die Grieke begryplikerwys gewoond geraak het aan die sagte verebed wat agtereenvolgende regerings vir hulle deur die uitspattige uitgawes gebied het. Die besnoeiings is dus pynlik; baie van hulle word nou in armoede gedompel of word werkloos.
En dus kom hulle in opstand. Woensdag het tienduisende mense in Athene betoog, en die parlementêre opposisie weier om saam met die regering te werk om ’n eenheidsfront te bewerkstellig.
Die land se premier, mnr. George Papandreou, het nou sy kabinet verander, maar dis ’n ope vraag hoe ver hy gaan kom.
Ten tweede skerm die EU-lidlande elkeen vir hul eie belange. Kiesers oor die hele vasteland is kwaad: Waarom moet húl belastinggeld gebruik word om die spandabelrige Grieke se bas te red?
En dus eis Duitsland en Nederland dat banke en private beleggers ’n deel van die pyn moet vat. Maar hul banke het reeds baie van die skuld deurverkoop, terwyl Frank-ryk, waar die banke kan seerkry, hom teen die Duitse/Nederlandse voorwaardes verset.
Die afgelope week het die EU-ministers van finansies lank in Brussel oor die saak vergader, maar kon nie ooreenstemming bereik nie.
Saterdag het The Guardian egter berig dat die waarnemende hoof van die IMF, die Amerikaner John Lipsky, besig is om die Duitsers se arm byna uit hul potjie te draai.
Die volgende weke sal wys wat gebeur. Maar as Griekeland omval, kan hy ’n groot deel van Europa met hom saamsleep.
Volg Nuus24 op Twitter
- Rapport