Heksery: Pa wil kind eet
2011-02-05 15:03
Sydney - ‘n Ouer in Papua-Nieu-Guinee word daarvan beskuldig dat hy, onder die invloed van sterk dwelms, sy pasgebore baba as deel van ‘n ritueel probeer eet het.
Die kind se gille het inwoners van die eiland wakker gemaak, waarna hulle op die grusame toneel afgekom het, het Australië se AAP-nuusagentskap Saterdag berig.
Die man is na ‘n polisiestasie gejaag waar hy in hegtenis geneem is.
Die baba het egter aan sy wonde beswyk.
“Dis ‘n uiters ontstellende insident,” het sers. Demas Tapea, polisiekommandeur in die dorp Tabulil, gesê.
“Die gemeenskap is kwaad en ontstel.”
Volgens Tapea word die situasie vererger deur die gemeenskap se “geloof in heksery en toordery.”
Volgens owerhede het die man ‘n lang geskiedenis van dwelmmisbruik, maar glo die gemeenskap dat die voorval deel van ‘n inisiasieseremonie was.
‘n Geloof in, sowel as die beoefening van heksery kom wydverspreid voor in die verarmde nasie van die suidelike Stille Oseaan.
Talle moorde in Papua-Nieu-Guinee word aan rituele en seremonies toegeskryf.
Volg Nuus24 op Twitter.
- AFP