Hare waai oor katte in Nieu-Seeland
2013-01-23 09:35
Wellington – Troeteldiereienaars in Nieu-Seeland is hoogs ontstoke oor 'n nuwe voorstel om van katte in die land ontslae te raak as deel van 'n natuurbewaringsinisiatief.
Gareth Morgan, 'n sakeman en filantroop, het 'n beroep op Nieu-Seelanders gedoen om van hulle katte ontslae te raak. Hy het daarop gewys dat 'n kat volgens die jongste navorsing elke jaar 'n gemiddeld van 13 inheemse diere, soos voëls, doodmaak.
Morgan voer aan dié syfer is onaanvaarbaar in 'n land waar baie voëlspesies reeds uitgewis is. Altesaam 37% van oorlewende voëlspesies in Nieu-Seeland is bedreigde spesies.
Hy het voorgestel dat eienaars hulle katte binneshuis hou, en nie meer dié troeteldiere koop nie.
"Natuurlik stel ek nie voor dat jy jou klein vriend nou oor die kop slaan nie," het hy Woensdag in die Dominion Post-koerant gesê.
"Maar as ons ernstig is oor natuurbewaring, moet ons erken dat ons diere aanhou wat van nature ander doodmaak."
Die land se dierebeskermingsvereniging het egter nie positief op dié voorstel reageer nie, en gesê Morgan het geen reg om mense voor te skryf nie.
"Ek sê vir Gareth Morgan, gee pad uit ons lewens," het Bob Kerridge, uitvoerende hoof van die vereniging, op die televisiestasie TV3 gesê.
"Moet ons nie ontneem van die wonderlike vriendskap wat 'n kat aan 'n individu of familie kan bied nie."
– Volg Nuus24 op Twitter.
- AFP
