'Harde werk lê nog voor'
2010-11-10 07:48
Djakarta – Washington se pogings om na die Moslemwêreld uit te reik is ernstig en sal Amerikaanse veiligheid verbeter, het pres. Barack Obama van die VSA gesê. Hy het egter erken dat nog werk voorlê.
Obama het Dinsdag in Indonesië, die digs bevolkte Moslemland ter wêreld, aangekom op ’n tweedaagse besoek.
“Met betrekking tot uitreiking aan die Moslemwêreld dink ek ons pogings is dood ernstig en langdurig,” het hy op ’n gesamentlike nuuskonferensie met pres. Susilo Bambang Yudhoyono van Indonesië gesê.
“Ons verwag nie om sommige van die misverstande en wantroue wat oor ’n lang tydperk ontwikkel het heeltemal uit die weg te ruim nie, maar ons dink ons is op die regte pad.”
Obama, wat in sy kinderjare ’n paar jaar in Indonesië gewoon het, ontvang groot steun in Indonesië ondanks ’n daling in vertroue in ander Moslemlande.
Obama het melding gemaak van verskeie Amerikaanse pogings om na die Moslemwêreld uit te reik. Dit sluit in onderwys en sake-inisiatiewe, soos ’n vergadering wat Moslem-entrepreneurs van oor die wêreld heen na Washington geneem het wat hy vanjaar aangebied het.
“Deur verhoudings uit te brei, word vertroue opgebou en dit skep geleenthede vir regstreekse persoonlike kontak.
“Dit sal goed wees vir ons veiligheid, maar sal ook goed wees vir groter verstandhouding tussen Amerika en die Moslemwêreld. Ek dink dis ’n onvoltooide projek en baie werk lê nog voor. Dit gaan nie die behoefte aan taai dialoog oor konkrete beleidskwessies elimineer nie,” het hy gesê.
Obama is ook oor een van dié moeilike beleidskwessies uitgevra, naamlik Israel se planne om 1300 nuwe woonstelle vir Joodse gesinne in die Arabiese Oos-Jerusalem te bou ondanks groot teenkanting van die Palestyne.
“Dit bekommer my dat nie een van die twee partye die ekstra moeite doen wat nodig is om ’n deurbraak te bewerkstellig nie.
“Dit is in die belang van Israeli’s en Palestyne om ’n skikking te bereik, om ’n deurbraak te maak. Maar elk van dié nadelige stappe kan die vertroue tussen die twee partye verbreek.”
Vandag is Obama se laaste dag in Indonesië. Hy sal vervolgens Suid-Korea en Japan besoek as deel van ’n tiendaagse Asiese besoek.
- Reuters