Haïti herdenk maand na aardbewing
2010-02-12 20:34
Port-Au-Prince – Haïti het Vrydag die nagedagtenis van sowat 200 000 mense herdenk, nadat hulle hul lewens ‘n maand terug in die dodelike aardbewing verloor het.
Ongeveer 1,2 miljoen mense het hul huise verloor in die aardbewing wat die hoofstad op 12 Januarie getref het.
‘n Seremonie sal in die stad plaasvind. Die regering het aangekondig dat hulle grootskerms by die kampe sal oprig sodat die mense daar ook die seremonie kan volg. Daar was ook aan die mense gesê om óf wit óf swart te dra, uit respek vir diegene wat gesterf het.
Donderdag se reënval was ‘n teken dat die reënseisoen oppad is, en dat voldoende huisvesting benodig word vir die sowat 1,2 miljoen wat steeds op straat slaap.
Ongeveer 50 000 families, oftewel 272 000 mense het noodmateriaal ontvang om hul eie skuilings te bou, volgens ‘n beampte van die Verenigde Nasies.
Intussen sal tien Amerikaners wat daarvan aangekla is dat hulle 33 kinders hier ontvoer het, agter tralies bly, tot ten minste volgende week. Die staat het nog nie besluit of hulle vrygelaat moet word nie.
- Sapa-AFP