Haïti betoog oor kosvoorrade
2010-02-08 05:19
Port-au-Prince, Haïti – Honderde mense het Sondag in die voorstede van Port-au-Prince betoog en ‘n burgemeester daarvan beskuldig dat hy kos wat deur bystandsgroepe geskenk is, opgaar en nie uitdeel nie.
Dié betogings het in die Petionville-omgewing van die hoofstang plaasgevind en is een van die grootstes sedert dié land op 12 Januarie vanjaar deur ‘n aardbewing geruk is.
Groepe van reg oor die wêreld het tonne rys en ander kos na Haïti gestuur maar die verspreiding hiervan aan slagoffers en haweloses was tot dusver stadig en soms selfs ordeloos.
Betogers het burgemeester Lydie Parent van korrupsie beskuldig en gesê hy gaar kosvoorrade op. Parent was nie beskikbaar vir kommentaar nie.
- Reuters