Haïti: Stof tot stof
2010-01-15 07:52
Erika Gibson
Oorlewendes van die verwoestende aardbewing in Haïti het gisternag saam met die lyke in die hoofstad se strate geslaap. Dit is te gevaarlik om in die wankelrige geboue in Port-au-Prince te slaap en daar is geen plek om al die dooies heen te neem nie.
Al hoe meer stofbesmeerde lyke en ledemate is gister op straat uitgedra. Die groot soektog na lewendes én dooies het saam met die ná-skokke voortgeduur. En die uurglas in die versengende tropiese hitte loop vinnig leeg vir enige oorlewendes wat nog vasgekeer is.
“Dit is nie ek wat hier help grawe nie. Dit is die hand van God, wat lief is vir die lewe en my lei sodat ek hierdie baba kan red,” het Jeanwell Antoine gesê terwyl hy met sy kaal hande ’n baba onder ’n hoop rommel uitgegrawe het.
Die aardbewing, wat 7 op die Richterskaal geregistreer het, het die hoofstad in een groot bouval verander.
Sommige mense het die aardskudding oorleef, maar nie hul beserings nie, want daar is nie genoeg mediese sorg nie.
Die dodetal kan selfs meer as 100000 beloop, het Jean-Max Bellerive, premier, gesê. Die Internasionale Rooi Kruis in Haïti se raming is tussen 45000 en 50000.
Die Rooi Kruis het gister ’n webwerf begin waar mense hul vermiste geliefdes se besonderhede kan plaas. Binne enkele ure was daar duisende mense se name op www.icrc.org/familylinks aangeteken.
Op ’n verskeidenheid tuistes op Facebook is die een foto ná die ander geplaas, met byskrifte soos: “Ek soek my ouma. Sy is blind en 81 jaar oud...”
“My suster en haar vyf kinders woon by hierdie adres. Ons weet nie waar hulle is nie.”
“Ons werk teen tyd en ons prioriteit is om oorlewendes te vind,” het me. Elisabeth Byrs, woordvoerder van die Verenigde Nasies se humanitêre koördineringskantoor, gesê.
Noodlenigingspanne het gister van oor die wêreld heen in die land begin aankom met die eerstes uit China en Frankryk.
Die Franse het ook ’n mobiele hospitaal gestuur, terwyl Dokters sonder Grense tydelike veldhospitale onder skuilings buite die hoofstad opgerig het.
Die dokters het in die brandende son gestaan en opereer en wonde toewerk met die toerusting en medikasie tot hul beskikking. Beseerdes is op deure, stukke hout en in kruiwaens aangery.
Die eerste Suid-Afrikaanse hulpspan behoort vandag in die land aan te kom.
Meer as 3 miljoen mense word regstreeks deur die ramp geraak en oudpres. Bill Clinton van die VSA, die Verenigde Nasies se spesiale gesant na Haïti, het gesê ’n sekondêre humanitêre ramp van ’n reusagtige skaal kan volg op die aardbewing.
- Beeld en Sapa-AFP