Haïti: Meisie se hand sonder verdowing afgesny
2010-01-18 11:59
Leogane, Haïti – Die hartverskeurende gille van ‘n jong meisie het Maandag steeds deur ‘n tydelike hospitaal weergalm nadat haar hand geamputeer is.
Sandyna Pierre (5) se moeder het langs haar bed gewaak nadat haar dogter se hand die vorige aand sonder verdowing geamputeer moes word, het Sky News berig.
Pierre se hand is ernstig beseer toe ‘n verwoestende aardbewing Haïti verlede week getref het. Duisende inwoners het uit vrees uit die hoofstad Port-au-Prince gevlug met die hoop om die angswekkende aardbewing, wat 7.0 op die Richterskaal weeg, te ontsnap.
Volgens Regan Ree, ‘n verpleegster, moes hulle die vyfjarige se hand amputeer maar was daar geen verdowingsmiddels of dokters beskikbaar nie.
Nuus24 het vroeër berig dat reddingspanne van reg oor die wêreld na Haïti stroom om uit te help. Verskeie areas wat deur die aardbewing verwoes is, het steeds geen hulp ontvang nie.
’n Suid-Afrikaanse reddingspan het Sondag in die verpletterde land aan die werk begin spring, het die internasionale departement van skakelwese gesê.
Hillary Clinton, Amerikaanse minister van buitelandse sake, het ontredderde inwoners van Haïti die naweek getroos en beloof dat Amerika hulle sal bystaan.
“Ons (Amerika) sal vandag, môre en in die toekoms hier wees,” het sy Saterdag met haar aankoms in die land gesê.
– Sapa, Sky News