Haïti: DNS-toetse help families herenig
2010-01-31 10:54
Madrid – Spanje gaan Haïti van ‘n DNS-toetssisteem voorsien om te help om verlore kinders met hul families te herenig en om die handel in kinders te bekamp.
Amptenare in Haïti sal speeksel- of bloedmonsters van kinders neem wat van hul families geskei is ná die aardbewing, asook van ouers wat vermisde kinders aangemeld het, het die Spaanse departement van buitelandse sake in ‘n verklaring gesê.
“Met hierdie monsters sal ‘n databasis geskep word wat beskikbaar gestel sal word aan Haïtiese owerhede.”
Die VN Kinderfonds het verlede week gesê 15 gevalle is al aangemeld waar kinders uit hospitale in Port-Au-Prince en omliggende gebiede verdwyn het.
Die genetiese toetssisteem DNA-Prokids het al gehelp om meer as 230 slagoffers van kinderhandel in 12 lande te identifiseer, het die departement gesê.
Dit is deur die Universiteit van Granada in die suide van Spanje ontwikkel en in 2009 in verskeie lande uitgerol. Spanje sal dit gratis aan Haïti verskaf.
- AFP