Haïti: 23 dood nadat vragmotor se remme ingee

2012-01-17 17:57

Port-au-Prince – Altesaam 23 mense is in Haïti dood nadat ‘n vragmotor se remme ingegee het en die voertuig ‘n ongeluk op een van die hoofstad se besigste strate veroorsaak het.

Nadia Lochard van Haïti se kantoor vir burgerlike beskerming het gesê die ongeluk het gebeur nadat die bestuurder beheer oor die voertuig verloor het, in ‘n klein bus vasgery het en daarna op die sypaadjie gery het.

Altesaam 67 ander mense is in die ongeluk beseer en na hospitale in die omgewing vir behandeling geneem.

Pres. Michel Martelly het die ongelukstoneel ook besoek, het sy kantoor gesê.

Die ongeluk het kort voor middernag Maandag gebeur.

– Volg Nuus24 op Twitter.
 

- Sapa - AP