Gyseldrama in Algerië sleep voort

2013-01-19 12:50

Algiers – Islamitiese ekstremiste hou steeds buitelanders as gyselaars aan by 'n gasaanleg diep in die Algerynse woestyn, het 'n sekerheidsbron gesê.

Dié nuus volg bykans 48 uur ná 'n mislukte reddingspoging deur die Algerynse weermag in 'n bloedbad ontaard het. Minstens 12 gyselaars en 18 ekstremiste het in die reddingspoging gesterf.

Die groep rebelle het gesê hulle hou steeds sewe buitelanders – drie werkers van België, twee van die VSA, een van Japan en een van Brittanje – in die kompleks in die Sahara-woestyn in die noord-ooste van Algerië aan.

'n Algerynse sekerheidsamptenaar het die aantal buitelandse gyselaars op minstens 10 geraam, maar meer werkers word steeds vermis, insluitend 10 van Japan en agt van Noorweë.

"Daar is geen verandering sedert gister nie, die situasie bly dieselfde," het die amptenaar Saterdag aan AFP gesê.

Die groep terroriste is volgens die Duitse nuustydskrif Focus onder die leiding van Mokhtar Belmokhtar (40), ’n Franse burger van Noord-Afrikaanse afkoms wat in Afganistan teen die Russe geveg het.

Die groep eis dat Frankryk sy militêre operasie in Mali stopsit.

– Volg Nuus24 op Twitter.

- AFP