Gyselaarsdrama laat 58 dood
2011-03-29 23:00
Tikrit (Irak) - Veiligheidsmagte het die provinsiale raadsgebou in die voormalige diktator Saddam Hussein se tuisdorp Tikrit, Irak, Dinsdag bestorm ná ‘n skietery, wat ure geduur het, tussen die magte en skieters in die gebou.
Die skietery het 58 mense dood en 97 mense gewond gelaat, het ‘n polisiebeampte gesê.
“Die jongste syfer is 58 dood en 97 gewond. Ses van dié wat gesterf het, was die aanvallers.
“Die veiligheidsmagte het nou beheer oor die gebou oorgeneem.”
Drie raadslede tel ook onder die oorledenes.
Die skieters, wat weermaguniforms en selfmoord-onderbaadjies gedra het, het die gebou bestorm nadat ‘n selfmoord-bomaanvaller sy toestel voor die gebou laat ontplof het en die pad vir sy makkers oopgemaak het, het veiligheidsbeamptes gesê.
‘n Motorbom het kort daarna ontplof toe polisiebeamptes by die gebou begin aankom het.
‘n Polisiekolonel, sy adjudant en ‘n joernalis is in dié ontploffing dood.
Dit was ure lank onduidelik hoeveel gyselaars aangehou is en of hulle lewend is of nie. Sommige werknemers het daarin geslaag om te vlug.
Dit is onduidelik presies wat in die drama gebeur het.
Hospitaalwerkers het gesê hulle het die lyke van die ses aanvallers ontvang. Twee van hulle het die bomme aan hul onderbaadjies geaktiveer en vier is deur veiligheidsmagte doodgeskiet.
- Volg Nuus24 op Twitter
- Sapa - AFP