Grootste ontploffing nóg ruk Damaskus

2013-02-22 10:23

Damaskus – Minstens 60 mense is dood toe ‘n motorbom naby die hoofkwartiere van Sirië se regerende party ontplof en wydverspreide skade veroorsaak het.

Dié aanval het die meeste lewens nog in Damaskus geëis sedert opstande in die land begin het.

Donderdag se aanval word deur beide die regime en sy teenstanders op “terroriste” blameer. Die ontploffing het plaasgevind kort voor ‘n mortieraanval by ‘n nabygeleë weermagkantoor.

Die staatstelevisie het beeldmateriaal van lyke langs verwoeste voertuie uitgesaai, en gesê daar is kinders onder die beseerdes. Die ontploffing het naby ‘n skool in die sentrale Mazraa-gebied plaasgevind.

Die aanval is deur “gewapende terroristegroepe uitgevoer wat bande met Al-Kaïda het, en wat finansiële en logistiese hulp van oorsee ontvang,” het die ministerie van buitelandse sake gesê.

Volgens die polisie het die bom by die 16 November-plein naby die Baath-party se hoofkwartiere ontplof. Russiese nuusagentskappe het berig dat die vensters van Moskou se ambassade uitgeblaas is. Niemand in dié gebou is egter beseer nie.

– Volg Nuus24 op Twitter

 

- AFP