Griekeland 'volgende maand bankrot'
2011-09-13 08:45
Den Haag - Die donderwolke pak al hoe swaarder saam oor Griekeland. Tensy ’n wonderwerk gebeur, sal die land aanstaande maand bankrot speel.
Die Griekse adjunkminister van finansies, Filippos Sachinidis, het Maandag in Athene gesê sy land het geld om sy verpligtinge – salarisse, uitkerings, ensovoorts – tot êrens in Oktober na te kom, maar dan is die geld op. Dis nou tensy die Europese Unie (EU) en Internasionale Monetêre Fonds (IMF) weer tot die Grieke se redding kom.
In beginsel het die EU en IMF ooreengekom om nog bedrae na Griekeland oor te plaas, mits die Griekse regering sy buitensporig spandabelrige beleid verander. (Sy begrotingstekort was verlede jaar meer as 12%, iets waaroor hy gelieg het.
Tien dae gelede het ’n afvaardiging van drie lede van die EU, IMF en Europese Sentrale Bank onverrigter sake uit Athene na Brussel teruggekeer met die oordeel dat die Grieke nie hul beloftes gaan nakom nie.
Die Franse minister van finansies, Valerie Pecresse, het Sondag gedreig Frankryk sal sy bydraes terughou as die Grieke, soos dit lyk, nie hul beloftes uitvoernie. Die Griekse premier, George Papandreou, het Saterdag weer beloof sy regering sal wel doen wat hy moet, maar dit lyk of die res van Europa hom eenvoudig nie glo nie.
Vandaar dat die Duitse minister van ekonomiese sake, Philipp Rösler, Maandag in ’n artikel in Die Welt die moontlikheid van ’n “geordende bankrotskap” van Griekeland geopper het. “Om die euro te stabiliseer, moet daar op kort termyn op ’n nuwe manier gedink word,” het hy geskryf.
Hy het ook ’n voorstel herhaal wat deesdae uit meer oorde gehoor word, naamlik ’n stelsel van “outomatiese sanksies” wanneer lande se begrotingstekort te groot word.
As ’n land bly oortree, moet selfs ’n einde aan sy stemreg in die EU-ministerraad “geen taboe meer wees nie”. As laaste stap moet ’n “geordende bankrotskap” moontlik wees.
Intussen spits die breë openbare debat in Europa hom toe op die vraag hoe ’n domino-effek in die geval van ’n Griekse bankrotskap voorkom kan word. Luidens berigte word die moontlikheid dat Griekeland uit die eurosone geskors word nóg in Duitse regeringskringe nóg in die Europese Kommissie in Brussel uitgesluit. ’n Nederlandse ekonoom, prof. Pieter Korteweg, het gewaarsku dat die EU “op die randjie van ’n afgrond balanseer”.
Volg Nuus24 op Twitter.
- Die Burger