Grieke hou massiewe staking

2011-10-19 14:20

Athene – Griekeland tref voorbereidings vir een van die land se grootste stakings terwyl betogers voortduur met hul optogte teen die regering se beplande maatreëls.

Luidens Sky News sal vakbonde wat sowat die helfte van die land se arbeidsmag verteenwoordig, aan ‘n 48 uur lange staking deelneem. Sowat viermiljoen mense vorm deel van dié arbeidsmag.

Die stakers betoog teen sommige maatreëls wat binnekort in die parlement goedgekeur kan word. Die maatreëls behels onder andere salarisverminderings en ‘n toename in belasting.

Groepe soos vullisverwyderaars en belastingbeamptes het die afgelope paar dae aan ‘n reeks stakings deelgeneem. Dié stakings is glo ‘n voorsmaak van die beplande 48 uur lange staking.

Daar word berig dat die staking die grootste een in Griekeland sal wees sedert die finansiële krisis begin het.

Lees meer hier

Volg Nuus24 op Twitter