Gif op besittings van Yasser Arafat gevind

2012-07-04 09:51

Kaapstad – Spore van die giftige radioaktiewe element polonium is op besittings van die ontslape Palestynse president Yasser Arafat gevind, het 'n Switserse instituut Dinsdag gesê.

Volgens 'n televisieberig dring Arafat se weduwee daarop aan dat sy liggaam opgegrawe word vir verdere toetse.

Die ontslape leier is in 2004 in 'n hospitaal in Frankryk dood ná 'n skielike siekte wat dokters laat kopkrap het.

Baie Palestyne vermoed lankal reeds dat hy vergiftig is.

Darcy Christen, 'n woordvoerder vir die Institut de Radiophysique  in Lausanne, het aan Reuters gesê die instituut het "verrassende" hoë vlakke van polonium-210 op Arafat se besittings gevind.

Christen het egter benadruk dat die simptome wat in sy mediese verslae beskryf word nie ooreenstem met polonium-210-vergiftiging nie.

Die Al Jazeera-nuuskanaal het berig dat die instituut persoonlike besittings getoets het wat deur Arafat se weduwee aan die instituut gegee is.

Volg Nuus24 op Twitter.