'Gholfbehepte' pa straf seuns wat mis slaan
2012-01-26 20:59
Melbourne – 'n Pa wat wou gehad het sy seuns moet die volgende Tiger Woods wees, is 'n opgeskorte vonnis opgelê nadat hy hulle geslaan het wanneer hulle hul houe gemis het, het die Herald Sun berig.
Die hof in Burnley Crown, Engeland, het gehoor die pa was behep met die idee dat sy seuns, wat ses en agt jaar oud is, professionele gholfspelers gaan word.
Die pa, wat nie geïdentifiseer mag word nie, het glo ook sy kinders gebyt, geknyp en hulle met gholfstokke geslaan. Hy het hulle selfs met die gholfballetjies gegooi, het die Lancashire Telegraph berig.
Die man is verlede jaar in Junie gearresteer nadat sy jongste seun met 'n merk in sy gesig skool toe gegaan het en deur sy onderwyser daaroor uitgevra is.
Volgens die polisie het die kinders na gholf as hul werk verwys.
"Ons gaan kampioen-gholfspelers wees wanneer ons ouer word," het die sesjarige glo aan die polisie gesê.
Die man het skuld erken op aanklagte van aanranding en is tot een jaar tronkstraf gevonnis, wat vir twee jaar opgeskort is.
– Kliek hier om die volledige storie te lees.
– Volg Nuus24 op Twitter.