Ghana: Opposisie verwerp verkiesingsuitslag

2012-12-10 10:49

Accra – Ghana se hoof-opposisieparty het Sondag die amptelike uitslag van die land se verkiesing verwerp ná John Dramani Mahama herkies is as president.

Die New Patriotic Party (NPP) het gesê die uitslag wat aangekondig is, weerspieël nie die mandaat van die meerderheid van Ghanese kiesers nie.

Die party sal glo Dinsdag bymekaarkom om moontlike optrede te bespreek en het in ‘n verklaring gesê daar is bewyse dat hul kandidaat, Nana Akufo-Addo, die verkiesing gewen het.

Volgens die nasionale verkiesingskommissie het Mahama se National Democratic Congress (NDC) 50,7% van die stemme gewen, terwyl Akufo-Addo 47,74% van die stemme op hom verenig het.

Die NPP het die NDC in die verklaring daarvan beskuldig dat hy bedrog gepleeg het, maar het ondersteuners gevra om kalm te bly.

– Volg Nuus24 op Twitter
 

- Sapa - AFP