Getuie vertel van wilde Berlusconi-partytjie
2012-05-24 23:00
Milaan – Italië se voormalige eerste minister Silvio Berlusconi het tydens een partytjie by sy luukse villa buite Milaan betaal vir seks, het ‘n getuie Donderdag gesê by ‘n verhoor waar Berlusconi daarvan aangekla is dat hy betaal het vir seks met ‘n minderjarige prostituut.
Natascia Teatino het aan die hof vertel dat ‘n vriendin genaamd Aris saam met wie sy na een van die partytjies gegaan het, beweer sy het “geld vir (seksuele) dade met Berlusconi ontvang". Sy het bygevoeg haar vriendin het nie gesê hoeveel sy ontvang het nie.
“Aris het vir my gesê ek kan bly en seks hê met Berlusconi, maak ek wou nie bly nie,” het Teatino gesê.
Berlusconi (75) is daarvan aangekla dat hy in 2010 betaal het vir seks met die Marokkaans-gebore Karima El Mahroug toe sy 17 jaar oud was,
Hy het daarna sy mag misbruik deur haar uit polisie-aanhouding vry te kry nadat sy vir diefstal in hegtenis geneem is.
Volgens aanklaers het tientalle meisies en aspirant-sterre kontant en ander geskenke ontvang wanneer hulle deelgeneem het aan seksspeletjies by sy huis in Milaan.
Ander getuies het ook aan die hof vertel van kontant en juwele wat hulle ontvang het in ruil vir seks.
Teatino se vriendin Aris is op die lys van getuies wat nog sal verskyn.
Berlusconi, wat die aanklagte ontken, sê hy het die jong vroue slegs uit vrygewigheid gehelp en beskuldig die landdroste van 'n polities bevooroordeelde veldtog teen hom. Hy sê sy partytjies was "elegante, gesellige etes".
Teatino het aan die hof gesê dat verskeie meisies teen die einde van die aand koeverte met geld ontvang het, maar sy het niks gekry nie.
“Ek was nie betaal nie, want, soos my vriendin Aris gesê het, het ek te veel vrae gevra,” het sy gesê.
Sy het ook beskryf hoe die aand begin het met drankies voor ete, waarna Berlusconi juwele uitgedeel het aan ‘n groep van sowat 20 meisies voordat hulle aangesit het vir aandete.
“Ná die ete het Berlusconi gesê ‘kom ons gaan na die bunga-bunga’ en hy het ons na die disko-vertrek geneem,” het sy gesê.
Sy het bygevoeg dat sy daar gesien het hoe hy en sy vennoot aan meisies wat lae-hals rokke en bikini’s dra se borste en boude vat.
– Volg Nuus24 op Twitter
- Reuters
