Gesteelde dogter vind ma ná 23 jaar
2011-01-21 11:25
New York – ‘n New Yorkse vrou, wat as ‘n baba uit haar hospitaalbedjie gesteel is, het haar regte ma ná 23 jaar opgespoor.
Koerante het Donderdag foto’s van Carlina White saam met haar regte ouers gepubliseer.
White was slegs 19 dae oud toe sy uit ‘n hospitaal in Harlem, New York ontvoer is en in Connecticut grootgemaak is.
Daily News berig dat White deur ‘n vrou grootgemaak is wat beweer het dat sy haar ma is.
Volgens New York Post het White jare lank oor haar “ma” getwyfel. Dié vrou het haar glo geslaan en dwelms gebruik.
White het Kerstyd besluit om ‘n nommer vir vermiste kinders te skakel en haar probleem aan te meld.
Ondersoekbeamptes het haar spoedig aan ‘n onopgeloste saak van 1987 gekoppel nadat DNS-toetse gedoen is. Sy is later met haar regte familie herenig.
“Ek is oorweldig. Ek’s net gelukkig. Dis soos ‘n fliek. Dis alles splinternuut vir my,” het sy gesê.
Volg Nuus24 op Twitter.
- Sapa - AFP