'Genoeg, dit is nou tyd vir Palestynse vryheid'
2011-09-24 07:05
New York – Mahmoud Abbas, Palestynse president, het sy land se versoek om ’n volwaardige lid van die Verenigde Nasies te word Vrydag amptelik by die VN-hoofkantoor hier ingedien.
Dit ondanks Israel se besetting van Palestynse grondgebied en die feit dat pres. Barack Obama reeds aangedui het die VSA gaan die versoek veto.
Abbas het ’n brief waarin volle VN-lidmaatskap vir die Palestyne gevra word aan die sekretaris-generaal van die VN, Ban Ki-moon, oorhandig.
Abbas het in sy toespraak in die algemene vergadering van die VN ’n olyftak na Israel uitgereik.
“Ek is hier om namens die Palestynse mense te sê ‘ons reik ons hande na die Israelse regering en mense uit’.”
Hy was egter onwrikbaar dat die Palestynse gebiede ’n onafhanklike staat behoort te word. “Genoeg, genoeg, genoeg. Dit is tyd vir die Palestynse mense om hul vryheid en hul onafhanklikheid te kry. Ons het een doelstelling – om te wees. En ons sal wees.”
Sy versoek aan die VN volg op 20 jaar van mislukte Amerikaans-gesteunde vredesonderhandelings met Israel.
Die veiligheidsraad van die VN sal Maandag vergader om die Palestynse versoek te bespreek.
Die Israelse premier, Benjamin Netanyahu, het vandeesweek met verskeie staatshoofde hier vergader om hulle te probeer oorreed om die Palestyne nie te ondersteun nie, omdat VN-lidmaatskap volgens hom ’n vreedsame oplossing van die Midde-Oosterse konflik in die wiele sal ry.
Hoewel die Palestynse gebiede van die stemme van ses uit die 15 lidlande in die veiligheidsraad verseker is – dié van Suid-Afrika, Rusland, China, Indië, Brasilië en Libanon – is nege stemme vir goedkeuring nodig.
As die versoek afgekeur word, kan die Palestyne om verhoogde waarnemerstatus, soos wat die Vatikaan tans het, aansoek doen.
Daarvoor is net die goedkeuring van die algemene vergadering nodig en die Palestyne sal dan deel van internasionale organisasies soos die Internasionale Strafhof in Den Haag kan word.
Dit sal Palestyne in staat stel om Israel van menseregteskendings aan te kla. – Mandy Rossouw en Reuters
Volg Nuus24 op Twitter.
- Volksblad