Genadedood-prof skuldig bevind op mindere klag
2011-11-03 07:02
Kaapstad. – Die klag van poging tot moord is Woensdag in Nieu-Seeland laat vaar teen prof. Sean Davison ná die genadedood van sy ma, maar hy is wel skuldig bevind op ’n mindere klag.
Davison is hoof van die forensiese laboratorium in die departement biotegnologie aan die Universiteit van Wes-Kaapland (UWK) en het na Nieu-Seeland teruggekeer vir sy verhoor.
Hy het in sy boek Before We Say Goodbye beskryf hoe sy siek ma, dr. Patricia Ferguson, hom gevra het om haar te help sterf.
Volgens die Otago Daily Times het die staatsaanklaer, Robin Bates, Woensdagoggend nadat die hofverrigtinge in die hooggeregshof in Dunedin hervat het, gesê hy wil die klagstaat wysig en ’n alternatiewe klag byvoeg.
Dié alternatiewe aanklag hou daarmee verband dat Davison op 24 Oktober 2006 “daartoe bygedra, en sy ma, Patricia Ferguson, bygestaan het om selfmoord te pleeg, en dat die persoon gevolglik probeer selfmoord pleeg het”.
Dié klag is aan Davison gestel. Volgens die koerant het Davison in “ ’n byna onhoorbare stem” skuld beken. Die regter het hom daarop skuldig bevind en die saak tot 24 November uitgestel.
Die regter het gesê ’n verslag ter versagting van die vonnis moet die moontlikheid om Davison elektronies te monitor as straf in oorweging neem.
Die aanklag van poging tot moord sal eers verwyder word sodra Davison op die ligter aanklag gevonnis word.
Sy regsverteenwoordiger, Roger Laybourn, het gesê die feit dat die hoofaanklag laat vaar is, is net soos ’n onskuldigbevinding.
– Volg Nuus24 op Twitter
- Die Burger
