Gemartelde Afgaanse meisie herstel stadig
2012-01-12 16:57
Kaboel – Die Afgaanse kinderbruid wat gemartel is in ‘n poging om haar in prostitusie in te dwing, is stadig besig om te herstel, maar kan nog skaars praat, het ‘n verpleegster aan AFP gesê tydens ‘n besoek aan die meisie Donderdag.
Die 15-jarige Sahar Gul, wat gebrand en geslaan is en wie se vingernaels uitgetrek is, is verlede maand in die keldervertrek van haar man se huis in die noordoostelike Baghlan-provinsie gevind.
Sy was vir ses maande lank in ‘n toilet toegesluit.
“Gul kan sedert die laaste paar dae baie stadig loop. Sy kan eet en in ‘n swak stem praat,” het die verpleegster, Latifa Mirzad van die Wazir Akbar Khan-hospitaal, gesê.
“Sy kan skaars oor haar ontbering praat, maar sy sê soms in ‘n swak stem: ‘My skoonpa en skoonma het my geslaan’.”
Gul se saak is Woensdag direk by president Hamid Karzai opgeneem deur ‘n afvaardiging van die Afghan Women's Network.
“Die president het verseker dat hy sy volle ondersteuning sal gee om die oortreders van die misdaad teen Sahar Gul ernstig te straf sodat niemand so ‘n misdaad in die toekoms pleeg nie,” het Lema Anwari van die netwerk gesê.
Karzai het ná die afvaardiging se besoek aan hom in ‘n verklaring onderneem om aksie te neem teen die “lafhartige” oortreders teen vroue.
– Volg Nuus24 op Twitter
- Sapa - AFP