Geld op pad vir Sandy-slagoffers

2013-01-07 08:25

Washington – Barack Obama, president van die VSA, het Sondag 'n wetsontwerp onderteken wat $9,7 miljard (sowat R82 miljard) se geldelike steun beskikbaar stel aan slagoffers van die superstorm Sandy.

Obama het die wetsontwerp kort ná hy by die Withuis aangekom het ná sy vakansie in Hawaii, onderteken.

Die nuwe wetsontwerp verskaf fondse aan die land se federale noodhulpagentskap (Fema) om die stortvloed versekeringseise van die duisende slagoffers wat deur die storm in Oktober geraak is, uit te betaal.

Fema het egter intussen gesê dié geld kan teen volgende week opdroog as daar nie bykomende fondse beskikbaar gestel word nie.

Die Withuis het verlede maand aansoek gedoen vir ‘n hulppakket ter waarde van $60,4 miljard (sowat R511 miljard).

Daar sal op die 15 Januarie oor die oorblywende $51 miljard (sowat R432 miljard) gestem word.

Altesaam 120 mense is in die VSA as gevolg van Sandy dood.

– Volg Nuus24 op Twitter.

- AFP