'Geen reëls oortree met Osama-boek'
2012-09-01 11:45
Washington – 'n Prokureur van die voormalige Amerikaanse Seal-spesialismarinier wat 'n boek geskryf het oor die klopjag waarin Osama bin Laden dood is, het gesê sy kliënt het nie ooreenkomste met die Pentagon verontagsaam nie.
Die prokureur het ook gesê sy kliënt "het die reg verdien om sy storie te vertel".
Die skrywer van No Easy Day het regsadvies ingewin voor hy besluit het om voort te gaan met die boek en is nie versoek om vooraf die manuskrip by weermagbeamptes in te dien, soos die Pentagon beweer nie, het Robert Luskin gesê.
Die voormalige marinier "is trots oor sy diens en eerbiedig sy verpligtinge," het Luskin in reaksie op 'n brief van Jeh Johnson, die Pentagon se prokureur, gesê.
Dít volg nadat die Pentagon met regstappe gedreig het oor die boek. Die afgetrede marinier het die boek onder die skuilnaam Mark Owen geskryf, maar is deur die media in Amerika as Matt Bissonnette geïdentifiseer.
Die boek, 'n eerstehandse ervaring van die klopjag op Bin Laden se woning in Pakistan, sal na verwagting volgende week vrygestel word.
Ingevolge 'n ooreenkoms wat in 2007 deur Owen onderteken is, moet boekmanuskripte slegs onder "sekere omstandighede" aan die Pentagon oorhandig word, het die prokureur gesê.
Hy het verder gesê dié ooreenkoms was nie van toepassing op die operasie wat Bin Laden by sy huis in Abbottabad geteiken het nie.
– Volg Nuus24 op Twitter
- AFP
