Gedroogde honde-penisse by slaghuis gevind
2013-01-16 14:31
Taipei – Beamptes in Taiwan het Woensdag gesê hulle het tydens ‘n klopjag by ‘n onwettige slaghuis op 400 gedroogde honde-penisse, testikels en verskeie ander interne organe beslag gelê.
Die sentrum vir die beheer van dieresiektes sê altesaam 435 penisse en ander liggaamsdele is in ‘n yskas gevind, terwyl 12 vars hondekarkasse ook Dinsdag tydens die klopjag by die slaghuis in Yunlin gevind is.
Dit was nie onmiddelik duidelik hoekom die eienaar van die slagtery die liggaamsdele gehou het nie, het ‘n woordvoerder gesê.
Die plaaslike media het bespiegel dat die man die penisse as ‘n bestanddeel in kruiewyn kon gebruik weens die bygeloof dat dit mans versterk.
Twee lewende honde is tydens die klopjag gered en beamptes het ook verskeie halsbande gevind, wat daarop dui dat van die dooie honde voorheen troeteldiere kon gewees het, het die woordvoerder gesê.
Die eienaar van die fasiliteit, wat daarvan verdink word dat hy hondevleis verkoop het, het reeds ‘n misdaadrekord nadat hy voorheen al diere doodgemaak het, het sy gesê.
Hy kan tot ‘n maksimum van een jaar tronkstraf gevonnis word en ‘n boete van tot Tw$1 miljoen (sowat R 304 000) opgelê word indien hy skuldig bevind word.
Hoewel hondevleis in die verlede op spyskaarte in Taiwan verskyn het, is dit nou ‘n oortreding om honde of katte te eet en enigiemand wat dit doen kan onder die plaaslike wet tot Tw$500 000 (R 152 987 ) beboet word.
– Volg Nuus24 op Twitter
- Sapa - AFP
