Gambië stel 9 op een dag tereg

2012-08-25 13:37

Johannesburg - Amnestie Internasionaal sê hy het van betroubare bronne verneem dat Gambië Vrydag nege mense tereggestel het.

Die land beplan ook om die res van die terdoodveroordeeldes  in sy tronke tereg te stel.

Agt mans en een vrou is Vrydagaand uit hul selle gehaal en tereggestel, sê Amnestie. Die groep het nie gesê hoe die mense doodgemaak is nie.

Die Wes-Afrika land se minister van inligting was nie onmiddelik beskikbaar vir kommentaar nie.

Amnestie sê die teregstellings is die eerste in die Afrikaland sedert 1987. Gambië het die doodstraf in 1995 teruggebring, en verskeie misdadigers is intussen tot die dood veroordeel. Die land het egter tot nou toe nog nie die straf toegepas nie.

Pres. Yaya Jammeh het egter vroeër vandeesmaand gesê hy sal al die gevangenes wat op die doodstraf wag, teregstel in 'n poging om toenemende geweldsmisdaad in sy land te bekamp.

Volgens Amnestie is daar 47 misdadigers in die land wat tot die doodstraf gevonnis is.

Volg Nuus24 op Twitter.

- SAPA