Gaddafi-seun wou na Mexiko vlug
2011-12-08 10:46
Mexiko-stad – ‘n Seun van die ontslape kol. Muammar Gaddafi en drie familielede het saamgesweer om onder valse name na Mexiko te vlug en in ‘n luukse oord te bly, sê owerhede in dié land.
Die uitgebreide plan om Al-Saadi Gaddafi na Mexiko te vat het na bewering twee Mexikane, ‘n Kanadees en ‘n Deense verdagte betrek.
Volgens Alejandro Poire, minister van binnelandse sake, is al die betrokke mense in hegtenis geneem.
Poire het nie bekend gemaak watter familielede die Gaddafi-seun wou vergesel nie. Al-Saadi is bekend vir sy liefde vir sokker en sy botsings met die polisie in Europa.
Die komplot is in September deur Mexikaanse intelligensie-beamptes ontbloot toe Al-Saadi uit Libië gevlug het. Hy het nooit in Mexiko aangekom nie, maar het die Wes-Afrika-land Niger bereik.
Die samesweerders het na bewering na Mexiko gevlieg en bankrekeninge oopgemaak. Hulle het ook eiendomme in verskeie dele van die land gekoop. Een van die eiendomme is by ‘n oord aan die kus.
Poire sê die leier van die komplot was ‘n Kanadese vrou, Cynthia Vanier. Sy is op 10 November saam met die drie ander verdagtes aangekeer. Hy sê Vanier was vermoedelik in beheer van die komplot se finansies.
‘n Mexikaanse vrou wat in die VSA gewoon het, word ook betrek. Poire sê sy was die skakel wat die vervalste Mexikaanse identiteitsdokumente bekom het.
‘n Deense man het die logistiek van die plan behartig, het Poire gesê.
Volgens Poire het die vermeende samesweerders ook na Kosovo en “talle Midde-Ooste-lande” gereis.
Die Mexikaanse beamptes het nie gesê of Muammar Gaddafi self by die plan betrek was nie. Hy is op 20 Oktober in Libië gevang en om die lewe gebring.
Volg Nuus24 op Twitter
- Sapa - AP