'Fukushima is stabiel,' sê premier
2011-12-16 16:19
Tokio – Yoshihiko Noda, Japan se premier, het Vrydag aangekondig dat die kernkragstasie wat in Maart deur die tsoenami beskadig is, stabiel is.
Dit is ‘n belangrike stap om uiteindelik ontruimingsbevele te kan ophef en die aanleg te sluit.
Noda se aankondiging is gemaak om die land te verseker dat vordering gemaak is in die nege maande sedert die ramp. Die tsoenami het op 11 Maart drie reaktors by die Fukushima Dai-ichi-kragstasie beskadig. Dit was die ergste kernkrisis sedert Tsjernobil in 1986.
“Die reaktors by die Fukushima Dai-ichi-kragstasie is stabiel. Dit lig ‘n groot bekommernis van ons skouers af,” het Noda gesê.
Kenners reken egter dat die kragstasie steeds kwesbaar is en dat die omgewing steeds met radioaktiewe bestraling besmet is. Dit kan 30 jaar of langer neem om die kragstasie op ‘n veilige wyse te sluit.
– Volg Nuus24 op Twitter.
- Sapa - AP