Fransman sit 14 maande vir pedofilie

2013-01-15 12:40

Phnom Penh – ‘n Twee-en-vyftigjarige pedofiel van Frankryk is Dinsdag in Kambodja tot 14 maande tronkstraf gevonnis nadat hy ‘n seun seksueel mishandel het.

Kinderregtegroepe het die straf gekritiseer en sê die termyn is te kort.

Philippe Lauwers is daaraan skuldig bevind dat hy ‘n “onsedelike daad teen ‘n minderjarige seun laat in 2011” gepleeg het, het regter Phong Vann by die suidelike Kandal- provinsiale hof aan AFP gesê.

Die seun is nou 16 jaar oud.

Die Fransman sal binne twee maande vrygelaat word, nadat hy reeds ‘n jaar in die tronk deurgebring het, behalwe as sy slagoffer appèl aanteken teen die vonnis, het die regter bygevoeg.

Lauwers was sedert sy inhegtenisneming in Januarie 2012 in aanhouding nadat hy daarvan verdink is dat hy drie seuns seksueel mishandel het. Een van hulle het later sy klagte teruggetrek.

Hy is beveel om $1 000 (R8 700) aan die seun te betaal in skadevergoeding en hy sal gedeporteer word ná sy vrylating.

Samleang Seila, die land se direkteur vir die kinderregtegroep Action Pour Les Enfants, sê die vonnis is “te toegeeflik”.

“Ons kan dit nie aanvaar nie. Die prokureur sal met die seun praat oor of hy appèl gaan aanteken teen die vonnis,” het hy gesê.

– Volg Nuus24 op Twitter
 

- AFP