Franse vies oor Sarkozy se hervormings
2010-09-09 08:50
Brussels – Een van die grootste stakings in die Franse geskiedenis het pres. Nicolas Sarkozy van Frankryk kniediep in die moeilikheid.
Gister het, volgens die vakbonde, tot 2,7 miljoen Franse werkers in die strate van Parys en anders stede betoog teen die regering se planne om die aftree-ouderdom van 60 tot 62 te verhoog.
Die stelsel het heeltemal onbetaalbaar geword. Diegene wat in die geboortegolf ná 1945 gebore is, het reeds afgetree of doen dit een van die dae. Hulle is opgevolg deur ’n beduidende kleiner volgende geslag, wat beteken dat al hoe minder jong mense al hoe meer oues moet onderhou.
Die regering wil ook €100 miljard (R930 miljard) in die volgende drie jaar besnoei om die begrotingstekort uit te wis. Terselfdertyd probeer Sarkozy die bitter pil versoet deur allerlei populistiese maatreëls wat xenofobie in die land voed.
Hy het byvoorbeeld ’n paar duisend Roma (sigeuners) uit die land geskop en hy berei tans ’n verbod op die dra van sluiers deur Moslemvroue in openbare plekke voor.
Die wetsontwerp maak voorsiening vir boetes van €150 vir vroue wat oortree en €30 000 en ’n jaar tronkstraf vir mans wat hul vroue dwing om ’n sluier te dra. Daarby word gewerk aan ’n wetsontwerp om die burgerskap van Franse burgers van immigrant-afkoms wat polisiebeamptes se lewe bedreig, weg te vat.
Desondanks daal Sarkozy se gewildheid steeds.
Die president het Woensdag in ’n verklaring gesê hy sal klein veranderings aan sy pensioenplanne maak, maar nie op die beginsel toegee nie.
Volg Nuus24 op Twitter
- Die Burger