Franse treurspel: Hollande 'sál skieters opspoor'
2012-09-06 20:01
Londen – Die Franse president, Francois Hollande, het Donderdag onderneem om die moordenaars van 'n Britse gesin, wat met vakansie in die Franse Alpe was, op te spoor.
"Alles sal gedoen word om die moordenaar of moordenaars op te spoor," het Hollande op 'n mediakonferensie in Londen, waar hy die Paralimpiese Spele bywoon, gesê.
"Die verhouding tussen Frankryk en Brittanje is baie sterk en ons sal alles doen om hulle op te spoor.
"Ons weet nie wat die motief vir die voorval is nie."
Die president het gesê Frankryk staan "in solidariteit" met die Britte oor Woensdag se aanval naby die Franse dorpie van Chevaline.
Die pa van ‘n gesin wat in die Franse Alpe vermoor is, is Donderdag geïdentifiseer as Saad al-Hilli, ‘n 50-jarige wat in Bagdad gebore is, het ‘n Franse polisiebron gesê.
Die 50-jarige man, sy vrou en 'n ouma is Woensdag gevind ná ‘n skietery waarin ‘n ander man ook dood is.
Twee dogters van die gesin het die treurspel oorleef.
Die polisiebron het bevestig dat die Hilli-gesin in Claygate, Surrey, in die suidweste van Londen gewoon het.
Een dogter wat ook geskiet is, is langs die motor gevind. Sy is in ‘n ernstige, maar stabiele toestand in ‘n hospitaal.
Haar vierjarige sussie het die aanval wonderbaarlik oorleef. Sy het sowat agt ure onder haar ma en ouma se lyke op die agtersitplek van die motor gelê voor sy gevind is.
– Volg Nuus24 op Twitter
- AFP
