Franse gyselaars steeds soek
2013-02-22 09:16
Maiduguri – ‘n Ontvoerde Franse familie van sewe is waarskynlik deur hul ontvoerders in twee groepe verdeel, het Franse owerhede Donderdag gesê.
Nigeriese veiligheidsmagte is besig om grensgebiede te fynkam om hulle op te spoor.
Die lede van die familie – ‘n paartjie, hul kinders, wat onderskeidelik vyf, agt, 10 en 12 jaar oud is, en die kinders se oom – is deur ses gewapende mans op drie motorfietse ontvoer terwyl hulle Dinsdag in Kameroen met vakansie was.
Volgens beamptes in Kameroen is hulle oor die grens na Nigerië geneem, hoewel Nigeriese militêre woordvoerders nie die inligting bevestig het nie.
Een Nigeriese sekuriteitsbeampte het op voorwaarde van anonimiteit gesê hulle soek naby die grens met Kameroen in die noordooste van die land. Die streek is op die rand van die Sahara, waar rebelle en bendes aktief is.
“Ons gee ons volle samewerking met beamptes van Nigerië en Kameroen om die plek te vind waar on burgers aangehou word,” het Frankryk se president, Francois Hollande, in Parys gesê.
Hy het gesê die prioriteit is om “eers die presiese plek te identifiseer waar (hulle) aangehou word, waarskynlik in twee groepe”.
Die familie, wat in Kameroen gebaseer was, het die Waza Nasionale Park besoek toe hulle ontvoer is.
Hulle is geïdentifiseer as Tanguy Moulin-Fournier en sy vrou Albane, sowel as hul vier seuns Eloi, Andeol, Mael en Clarence.
Tanguy se broer, Cyril Moulin-Fournier, was saam met hulle en is ook ontvoer. Die drie volwassenes is almal ongeveer 40 jaar oud.
– Volg Nuus24 op Twitter
- Sapa - AFP
