Franse gyselaar tereggestel

2013-01-17 16:58

Nairobi – Islamiete in Somalië het Donderdag gesê hulle het 'n Franse intelligensiebeampte wat hulle al vir meer as drie jaar gyselaar hou, tereggestel.

“16:30. Woensdag, 16 Januarie 2013. Denis Allex is tereggestel,” het die Shebab-groep op Twitter geskryf.

“Klank en video van die teregstelling is beskikbaar en sal vrygestel word wanneer ons so besluit,” het ‘n woordvoerder van die Al-Shabaab-groep Donderdag aan AFP gesê.

Allex is in die dorpie Bulomarer tereggestel.

Franse soldate het Saterdag ‘n aanval op die dorpie uitgevoer om die gyselaar te bevry, maar die poging het misluk en het twee Franse soldate se lewens geëis.

Al-Shabaab het Woensdag gesê hy sal die gyselaar teregstel om wraak te neem vir die talle Moslems wat in Franse aanvalle gesterf het.

Amptenare in Parys meen die beampte is waarskynlik reeds tydens die mislukte reddingspoging deur sy ontvoerders om die lewe gebring.

– Volg Nuus24 op Twitter
 

- Sapa - AFP